Kabul Kandaharkadil Katha (काबूल कंदाहारकडील कथा)
अफगाणिस्तानसारख्या अत्यंत मागासलेल्या देशाचा अगदी वास्तव इतिहास मांडण्याचा लेखिकेने केलेला प्रयत्न म्हणजे 'काबूल कंदाहारकडील कथा' हा संग्रह होय. हजारो वर्षांपासूनचा इतिहास मांडण्याचा प्रयत्न खरोखरच स्तुत्य असा आहे. या देशावर आजपर्यंत सत्ता गाजवलेल्या सत्ताधाऱ्यांनी कशा प्रकारे राज्य केलं याचं चित्रण या कथांमधून केलेलं आहे. अगदी सुलतान मोहम्मदापासून ते आजच्या हमीद करझाई यांच्यापर्यंतचा घडलेला इतिहास मांडून अफगाणिस्तानच्या जनतेची झालेली ससेहोलपट यातून स्पष्ट केली आहे. रशियाने सत्ता ताब्यात घेऊन अमानुषपणे केलेले हत्याकांड, जनतेला वेठीस धरून केलेला छळ याचं भीषण चित्र यामधून उभं केलेलं आहे. आर्थिक, सामाजिक, राजकीय प्रवाह, इतिहासाची मोडतोड, समाजाची जडण- घडण यासारख्या गोष्टी तर सतत होतच राहतात; मात्र त्यामध्ये होरपळणाऱ्या सर्वसामान्य जनतेची, माणसांची सुख-दु:खं ही मात्र चिरंतन असतात. तोच खऱ्या अर्थाने मानवी इतिहास असतो- शाश्वत टिकणारा. म्हणूनच याला जास्त महत्त्व आहे. यातील सर्व कथां या एका वेगळ्याच दुःखाच्या कथा आहेत. या दुःखाची जातच वेगळी आहे. या दुःखितांच्या मनात शिरून त्यांचा कानोसा घेऊन या कथा उत्कृष्टरीत्या लेखिकेनं मांडल्या आहेत. यातील सर्व पात्रं हाडामांसाची, खरीखुरी माणसं आहेत. ज्यांनी हे दुःख भोगलं त्यांची दुःखं वाचकांपर्यंत पोहोचवण्याचं कार्य लेखिकेनं अगदी प्रामाणिकपणे केलेलं आहे. चिकित्सक पध्दतीने अफगाणिस्तानचा मानवी इतिहास मांडून लेखिकेनं खरं म्हणजे वाचकवर्गावर उपकारच केले आहेत, असं म्हणणंच योग्य ठरेल.
